您现在的位置:首页 > 夜光杯 > 正文

晨读 | 阿拉小辰光个暑假

来源:新民晚报     作者:赵妃蓉     编辑:王瑜明     2018-07-21 07:10 | |

  阿拉小辰光的暑假,充实,简单又快乐。

  阿拉小辰光最欢喜放暑假了,因为伊个辰光每个礼拜只有休息一天,暑假倒是和现在一样,有长长个两个月,暑假作业也不多,一本薄薄个《暑期生活》,最后两页还有答案,顶多语文老师再布置两篇作文,随便写写就好了,剩下来个日脚就是白相啦,伊个辰光既勿流行假期补课,也呒没各种“社会实践”,但感觉每天过得相当充实,简单又快乐。

  暑假里因为天热,白天阿拉欢喜让隔壁邻居小朋友到屋里来白相,一起玩“角色扮演”游戏。例如把凳子排成一竖条就可以充当“开汽车”游戏个布景,把平时攒个公交车票用木头个晾衣夹子夹起来充当游戏道具,然后有人扮演卖票员,有人扮演乘客,还有人扮演司机。通常女孩子欢喜当卖票员,男孩子欢喜当司机,大家最勿愿意当个是乘客,因为呒没啥事体做。

  有辰光阿拉还会把床罩搭在一排凳子上,就像帐篷一样,钻进钻出,就可以白相打仗游戏或丛林探险游戏了。虽然除了这些家居用品,阿拉呒没啥特别个玩具,但是每趟主题确定以后,凭着脑子里个想象,大家嘴巴里发出滴滴滴、砰砰砰个叫声,照样开开心心白相得满头大汗,直到那些小朋友个家长来叫伊拉回去吃饭才会结束。

  现在个小朋友习惯孵空调房,适意是适意了,但是寒气太结棍,阿拉小辰光热天也是蛮热个,阿拉个降温办法是一天要用湿拖把拖两趟地板,靠水分蒸发带走热量,达到降温目的,效果蛮好,也锻炼了身体。

  伊个辰光电视机里个节目勿好回看,也呒没网络,要看五点半个动画片一定要算好辰光,有辰光实在来不及了,就辣辣隔壁邻居门口看一歇,看好再回去。伊个辰光,到了热天,每家人家个大门是敞开个,好像也呒没人觉得勿安全。最近电影《侏罗纪世界2》交关多个人侪去看了,伊个辰光有部日本个连续剧《恐龙特级克赛号》,虽然特技粗糙,情节老套,永远是地球受到外星人攻击,然后打打杀杀拯救世界,但是阿拉总归会准时收看,坐得比上课还端正。

  到了六点钟,中央电视台个《米老鼠与唐老鸭》开播了,每趟唐老鸭一出场拉开幕布,阿拉就会压低嗓门和他一起喊——“演出开始了”,但因为迭个动画片里人物个运动速度和画面切换侪相当快,所以我一直觉得越看越热,不太适合热天看。

  现在个小朋友一放暑假有交关多个夏令营参加,阿拉小辰光呒没搿种商业夏令营,我参加过区三好学生个夏令营,勿需要交钞票,只要交一点全国粮票就可以了。记忆中,搿是我人生第一趟出远门,心情相当激动,从上海乘船到普陀山,一路浪向空气里侪是海风个味道,直到现在,每趟去海边休假,闻到海风个味道,我侪会想起迭次出行,轻舞飞扬,且歌且行……(赵妃蓉)

今日热点

网友评论 小提示:您要为您发表的言论后果负责,请各位遵守法纪注意语言文明
您还能输入300
最新评论 [展开]

新民报系成员|客户端|官方微博|微信矩阵|新民网|广告刊例|战略合作伙伴

新民晚报|新民网|新民周刊|新民晚报社区版

新民晚报数字报|新民晚报ipad版|新民网客户端

关于新民网|联系方式|工作机会|知识产权声明

北大方正|上海音乐厅|中卫普信|东方讲坛|今日头条|钱报网|中国网信网|中国禁毒网|人民日报中央厨房

增值电信业务经营许可证(ICP):沪B2-20110022号|互联网新闻信息服务许可证:31120170003|信息网络传播视听节目许可证:0909381

广电节目制作经营许可证:(沪)字第536号|违法与不良信息举报电话15900430043|网络敲诈和有偿删帖跟帖评论自律管理承诺书

|沪公网安备 31010602000044号|沪公网安备 31010602000590号|沪公网安备 31010602000579号

新民晚报官方网站 xinmin.cn ©2017 All rights reserved