上海人“吃”眼啥物事

民以食为天，啥人也离勿开吃。不过，上海人个吃，勿像吃饭、吃菜、吃肉……还有交关是勿好吃个。

“排骨”可以吃，“排头”就勿好吃了。上海话里个排头是指靠山。老早皇帝会拨钦差金牌，见金牌如见皇帝。后来，“金牌”变成“牌头”，“牌头”变成“排头”。“靠排头”又延伸出近义词“照排头”，指靠别人个力量或关系办事。譬如讲：“伊是老大，这顿饭照排头应该伊埋单了。”“照排头”反义词是“吃排头”。长辈训晚辈，上司批评下属，侪叫“吃排头”。

“吃排头”只是嘴巴浪讲讲，再进一步就是“吃生活”。辣辣屋里向，一般指小囡要拨爷娘打，引申到单位，就是受处分。再引申一下，工作当中使用工具勿当心，结果“吃了记生活”，搿是指拨工具打伤。

从“吃生活”再引申出去，有“吃拳头”“吃马荔枝”。“吃拳头”带一眼流氓作风，《七十二家房客》里个“流氓炳根、警察三六九”碰碰要拨人家“吃拳头”。“吃马荔枝”并不是真个吃荔枝，是指用食指关节敲对方额头，通常是朋友间开玩笑，或者大人教训小囡。

北方闲话里有句 “吃饱了撑的”，还有句“吃不了兜着走”，比喻勿识大局惹出事体，只能自己承受。辣上海话里，“侬吃饱了？”就能表达同样意思。四个字加问号显得含蓄交关。当然，侬辣饭桌浪向因为呒没胃口只吃一点点饭，别人出于关心，也会问“侬吃饱了？”同样四个字，语调相差交关，意思完全不同。前面“侬吃饱了？”重音落辣“侬”，声调变高，讲到“侬”还要停一停。后面搿句轻声慢语，讲到“侬”也勿需要停。

豆腐辣上海菜里邪气受欢迎，但上海闲话里讲到“吃豆腐”更多是用来表示调戏、轻薄。

“吃煞侬”一般用辣辣表示爱情方面比较多。对意中人相当痴情，用“喜欢”嫌情意勿够深。用“爱”好像还差一眼。“吃煞侬”就比单单“吃侬”程度大交关了。

上海闲话里“吃软饭”是指靠女人养活个男人。搿句闲话个出处呒没办法考证。据说老早有个富婆带包养个小白脸去饭店吃饭。店伙计看富婆年纪大，就问“吃饭软点还是硬点？”小白脸晓得富婆牙口勿好，要讨伊欢喜，讲“吃软一点。”店伙计笑说：“侬也吃软饭啊？”“吃软饭”就搿能样子传开了。

“吃香”表示受欢迎，例句：伊辣单位里老吃香嗰。“吃价”是“吃香”个近义词，形容“平凡而干大事”。还有近义词“吃得开”形容路路通，受欢迎。反义词“吃勿开”形容不受欢迎，行不通。

上海闲话当中还有“吃伊老实”个讲法。其中“吃”意思是“欺负”。“吃伊老实”就是“因为伊老实所以欺负伊”；不过，有辰光“吃”也可以表示“欢喜”，“吃伊老实”就表示“因为伊老实所以欢喜伊”。迭个就要看上下文意思了。（刘其舜）