秋天是桂花味嗰

搿天去朋友屋里送艺博会门票，天气蛮热，稍许动一动，汗汤汤滴。车子停辣伊拉小区门外头，急匆匆进门，拿票子交到门卫手里，简单交待几句，就急匆匆朝外头走。现在啥地方停车侪勿便当。

心急慌忙间，隐隐约约闻着桂花香气，甜甜嗰，带点清凉。别转头去寻，呒没寻着桂花个影子，也勿晓得是啥地方飘过来个香气。

总觉着离桂花开个辰光还早，日里向还是三十一二摄氏度个天气，桂花是冷脾气呀，西北风勿吹，伊勿肯开。再想想，早浪向起来，到底也是看得见秋露了。所以，唐朝诗人施肩吾有诗道：“夜吟秋山上，袅袅秋风归。月色清且冷，桂香落人衣。”讲嗰应该就是初秋，月色清冷桂花香，风吹桂花沾衣衫个样子。

桂花是讨人欢喜嗰。就算是坚强如李清照，也欢喜。“暗淡轻黄体性柔，情疏迹远只香留；何须浅碧深红色，自是花中第一流。”轻轻柔柔、文文雅雅，但就是迭个一缕香气，让人呒没办法忘记；辛弃疾也讲伊，“大都一点宫黄，人间直恁芬芳，怕是秋天风露，染教世界都香”。

所以，欢喜到交关人想尽办法要拿桂花香气留下来、闶起来。

侬试试看，拿伞撑开，翻过来，立辣一棵开足开满桂花个树下头，轻轻摇一摇，桂花扑簌簌落辣伞里；拿桂花收起来，辣盐水里浸一刻钟左右，捞出来风干；准备一只广口瓶，轻轻交一层桂花一层糖铺满，最后用糖封口，盖紧，蜜两个礼拜左右。之后，需要个辰光，侬就可以打开，舀一点出来。

侬看，一勿当心，侬就拿日脚过成了一罐糖桂花个样子。（沈一珠 图文）