您现在的位置:首页 > 夜光杯 > 图话 > 正文

上海闲话 | 结件绒线衫挡挡寒

来源:新民晚报     作者:沈一珠     编辑:史佳林     2019-11-17 13:57 | |

立冬已过,天气越来越冷。按照古人个讲法,立冬节气分成三候,一候水始冰,二候地始冻,三候雉入大水为蜃。啥意思呢?就是讲之后个十五天里向,天气个变化可以用眼睛看得出来:先是水开始结冰;然后,烂泥逐渐冻得硬邦邦;再进一步,羽毛斑斓个锦鸡潜入水中,化身为一种叫大蛤个水产品。

锦鸡变成大蛤?搿个脑洞也是相当大嗰。勿过,辣当时个条件下头,古代人对大自然里交关物事呒没办法解释:为啥立冬以后野地里锦鸡之类个大鸟越来越少,海边却可以看到外壳与锦鸡个线条和颜色相似个大蛤,所以就想当然认为锦鸡变大蛤了。就像古代人难以想象,明明已经立冬了,为啥现在马路浪还可以看见有交关人穿仔单衣单裤,手里拿仔只冰淇淋球边走边吃,好像一点勿觉得冷——人个身体素质越来越好了,地球也越来越暖了。

总记得,阿拉小辰光,从秋风扫落叶开始,姆妈就开始结绒线衫、绒线裤了。夜里向天气冷,有辰光邻居道里,一道孵辣灶披间里结绒线。煤球炉已经封脱了,一只铜壶装满水,炖辣炉子上头;偶然,会有热气拿铜壶盖头顶得噗落噗落跳。

结绒线是仔细生活,茄茄山河,一勿当心会漏针错针。顶怕等发现辰光,已经结仔两三寸了,乃末好,结结一大歇,拆拆一歇歇。有辰光,也会因为勿称心,拆光仔重新来过。小人长得快,一件绒线衫会存心结得稍许大一眼。等一件绒线衫短了,袖口磨毛了,就要拆脱重新再结了。

辣绒线个拆拆结结之间,小人长大了,大人变老了,交关物事也变得物是人非了。

立冬以后,总归是冷天了,早晚加件衣裳。假使能有一件姆妈结个绒线衫,应该是顶暖热嗰。(沈一珠 图文)

今日热点

网友评论 小提示:您要为您发表的言论后果负责,请各位遵守法纪注意语言文明
您还能输入300
最新评论 [展开]

新民报系成员|客户端|官方微博|微信矩阵|新民网|广告刊例|战略合作伙伴

新民晚报|新民网|新民周刊|新民晚报社区版

新民晚报数字报|新民晚报ipad版|新民网客户端

关于新民网|联系方式|工作机会|知识产权声明

北大方正|上海音乐厅|中卫普信|东方讲坛|今日头条|钱报网|中国网信网|中国禁毒网|人民日报中央厨房

增值电信业务经营许可证(ICP):沪B2-20110022号|互联网新闻信息服务许可证:31120170003|信息网络传播视听节目许可证:0909381

广电节目制作经营许可证:(沪)字第536号|违法与不良信息举报电话15900430043|网络敲诈和有偿删帖跟帖评论自律管理承诺书

|沪公网安备 31010602000044号|沪公网安备 31010602000590号|沪公网安备 31010602000579号

新民晚报官方网站 xinmin.cn ©2019 All rights reserved