上海闲话 | 有些味道要珍惜，比如吃蟹

秋风逐渐清凉，又到吃大闸蟹日脚了。又想起去年、前年、再从前去阳澄湖吃蟹个事体。

虽然超市、小菜场侪有卖蟹个摊位，不过，交关上海人就是欢喜约仔朋友一道去阳澄湖。当然，不同朋友也会有不同场景：

十几年前去过一趟。搿辰光开部车子自驾游还是一桩比较新鲜个事体。一对大人两个小人一部车子老乐惠。只不过，大人小人各怀心思：大人一门心思吃，小人痴头怪脑疯。

蟹味道忘记脱了，开开心心场面还记得，眼睛一眨，迭两个小人侪已经出道了。

两年前头去过一个地方，是朋友带得去嗰。老板叫阿胡子，看上去老农民一个，生意做得蛮大，自家屋里湖里有蟹、田里有稻、房前屋后有桔园。吃好仔大闸蟹，钞票一付，阿胡子眯花眼笑，讲：树浪向桔子大家随便采。

蟹味道就迭能样子啦，印象深嗰反而是阿胡子上世纪70年代结婚用个矮平房，现在搿间房子已经堆满柴爿了。

从前跟今朝之间，就隔了一地鸡毛。

一年前应该是跟老同学一道去嗰，吃蟹个地方靠近常熟，蟹个味道当然也是好嗰。勿过，记忆里印象更深嗰倒是一群老同学轧了一作堆，辣灯光月影里拍照，大家侪是趴手趴脚、兴高采烈，少年情谊不同一般。

有些味道稍纵即逝，要珍惜。

【沪语解释】

出道：长大成人。

眯花眼笑：眉开眼笑。

趴手趴脚：伸手伸脚。（沈一珠 图文）