上海闲话 | 卡萨布兰卡和瑞克咖啡馆

近腔把去了一趟摩洛哥，卡萨布兰卡也辣行程之中。讲到卡萨布兰卡就想起经典电影《北非谍影》，以及英格丽·褒曼、亨弗莱·鲍嘉，搭仔一只叫“瑞克”个咖啡馆。

其实搿部电影到底讲啥故事已经记勿清爽了。毕竟，连得拍电影个褒曼搭仔鲍嘉也搞勿大清爽，伊拉到底演了点啥。据褒曼讲，导演每天拨伊一眼台词，叫伊阅读、理解。大家也勿晓得剧情会哪能发展、又哪能结束，也呒没办法弄明白人物个性格。伊甚至讲，伊也一直想晓得伊到底欢喜嗰是啥人，是鲍嘉演个瑞克咖啡馆老板呢，还是另外一个人演嗰反法西斯领袖？鲍嘉也讲，伊每天侪要问导演，今朝到底演啥？结果有人告诉伊，还勿肯定。侬到辰光认认真真演就可以了。

事先呒没人能够想到，让演员演得稀里糊涂个一部电影，后来居然获得第16届奥斯卡奖个最佳影片、最佳导演、最佳剧本奖。真是世事难料。

只勿过，对阿拉来讲，电影得啥奖好像也勿重要了，重要个是，因为搿部电影，一座城市变成了旅游热点，有几个上海人不远万里来到此地，坐辣瑞克咖啡馆里，喝一杯咖啡，吃一顿饭。然后，浮想联翩。（沈一珠 图文）