已经过去个冬至是一个有意思个节气,搿天,白天顶顶短,天气顶顶冷,而辣辣迭个顶短顶冷个后头,是天地之间勿声勿响发生个变化——阳气开始上升了。
蜡梅花可能是顶早感受到迭种刚刚从地底下升起来个阳气嗰。所以,宋代有一个叫高荷个诗人,写过一首《蜡梅》:“少镕蜡泪装应似,多爇龙涏臭不如。只恐春风有机事,夜来开破几丸书。”前两句就是平平常常个描写,蜡梅花长得又香又好看,像煞是蜡做嗰;后头两句就有玄机了:春风恐怕马上要到了,勿相信去看,夜里向开个几朵蜡丸,就是带口信来了呀。有意思口伐,梅花个心事,诗人看出来了。
只勿过,从转变到结果,还是有一大段过程。比方讲,冬天到了,春天还会远吗?勿远,还有两个半号头。所以,有意思个古人就想出了一只画梅消寒个游戏:从冬至搿日开始,先画一枝素梅辣纸头浪,之后,日日画一朵梅花上去,九九八十一天之后,八十一朵梅花画好了,也就冬去春来了。
梅花啊梅花,侬好事体做到底了,蜡梅开好红梅开,搿段辰光,侬要有始有终全程陪同。
当然,迭个过程当中,阿拉有空也有一桩事体好做:蜡梅花可以窨茶。顶好是含苞待放个,配普洱、白茶、乌龙之类,寻只茶罐头,一层花,一层茶,铺满后,盖紧。十天,半个号头,拿出来,挑出梅花,再拿茶烘烘干,就可以了。
勿错,迭个冬去春来,阿拉有梅花相伴。(沈一珠 图文)
新民报系成员|客户端|官方微博|微信矩阵|新民网|广告刊例|战略合作伙伴
北大方正|上海音乐厅|中卫普信|东方讲坛|今日头条|钱报网|中国网信网|中国禁毒网|人民日报中央厨房
增值电信业务经营许可证(ICP):沪B2-20110022号|互联网新闻信息服务许可证:31120170003|信息网络传播视听节目许可证:0909381
广电节目制作经营许可证:(沪)字第536号|违法与不良信息举报电话15900430043|跟帖评论自律管理承诺书
|沪公网安备 31010602000044号|沪公网安备 31010602000590号|沪公网安备 31010602000579号
新民晚报官方网站 xinmin.cn ©2019 All rights reserved